Human Rights Watch (HRW) denuncia nun “estudio de caso”, publicado a semana pasada, que os Estados Unidos seguen a enviar detidos de Guantánamo ós seus países de orixe, onde en ocasións foron condenados in absentia e con frecuencia sofren torturas e outros abusos.
O estudio de caso leva por título “Ill-Fated Homecomings: A Tunisian Case Study of Guantanamo Repatriations”.
Hai un breve extracto en español na nota de prensa “No envíen detenidos en Guantánamo de regreso a la tortura y abusos en sus países: Una vez más las ‘garantías diplomáticas’ demuestran ser inadecuadas”.
O procedemento que usaron os Estados Unidos con estes dous detidos que enviaron á Tunisia o pasado mes de xuño coñécese como “garantías diplomáticas” (diplomatic assurances): o país receptor comprométese a tratar de forma humanitaria ós detidos.
Por desgracia, sabemos que en moitas ocasións os países receptores non cumpren o prometido. Sirva como exemplo o informe que publicou HRW en marzo do 2007, The “Stamp of Guantanamo”: The Story of Seven Men Betrayed by Russia’s Diplomatic Assurances to the United States.
