Algoritmos con algo de ritmo (folclore húngaro e computación)

A idea para estes vídeos naceu na Universidade Sapientia, creada polos húngaros de Romanía. Os húngaros son unha minoría étnica e lingüística no conxunto do Estado romanés (un millón e pico, un seis por cento), pero o seu número é moi significativo en sete das dezaoito provincias (Hargita ten un 85%, Kovászna un 74%, Maros un 38%, Szatmár un 34%). Esta distribución correspóndese, por regra xeral, coa rexión histórica coñecida como Transilvania, que formaba parte de Hungría antes do Tratado de Trianon.

O grupo universitario mantén unha páxina moi didáctica titulada Algo-rythmics. Os intérpretes de música e danza pertencen ó grupo folclórico de Marosvásárhely Maros Művészegyüttes. A min encántanme a idea e a música… :-)

Este vídeo, por exemplo, mostra graficamente e con algo de ritmo o algoritmo de ordenación quicksort, moi usado en computación. Os procesadores fan este baile millóns de veces por segundo:

Este outro fai o mesmo co algoritmo shellsort:

O conxunto dos vídeos pode verse na citada páxina didáctica ou no canal de Youtube asociado.

Por que os reis son reis

Esta viñeta que vin hoxe no Facebook e cuxo autor é “El Roto” (El País, 20 – IV – 2012) recordoume ó escritor e pedagogo Gianni Rodari. Rodari formulaba miles de preguntas como método de creación, e respondeu a unha delas con desacostumada contundencia: “¿Por que os reis son reis? Os reis son reis porque o din eles. Pero sono so mentras a xente llelo permite. Cando o pobo se dá conta de que os reis son persoas como as demais e ten forza abondo para botalos, proclámase a república. […]”. Para reflexionar.

Texto da viñeta:

“El poder emana del pueblo: de su sumisión, concretamente”.

Morreu Avelino Pousa Antelo

Hoxe morreu, con 98 anos, o mestre e político galeguista Avelino Pousa Antelo. Militou, antes da Guerra Civil, nas Mocedades Galeguistas. Foi pioneiro na introdución da agricultura na escola, dirixindo desde o 1948 a Escola Agrícola “Granxa de Barreiros”. Promoveu a creación, no 1984, da Fundación Castelao, e traballou incansablemente nela ata a súa morte.

Nos últimos tempos deixáronnos varios galeguistas desta xeración, que deberiamos estudar para aproveita-la súa sabedoría e experiencia: Avelino Pousa Antelo (1914 – 2012), Xaime Isla Couto (1915 – 2012), Isaac Díaz Pardo (1920 – 2012) e Francisco Fernández del Riego (1913 – 2010).

Unha mostra da lucidez e da retranca de Avelino Pousa Antelo (vídeo do ano 2009)…

Para que serve un libro e como se usa (viñetas)

Hoxe traio dúas viñetas sobre a lectura. Dentro de pouco, haberá que explicarlles ós rapaces para que serve un libro e como se usa…

Texto: “Chámase ‘ler’. Así é como a xente instala software nos seus cerebros”.

Texto: “Pon o libro na cabeza, pero dentro da cabeza, non enriba dela”. Hai un xogo de palabras coas preposicións inglesas in e on. Tamén hai unha crítica ó rol da muller que debía aprender a camiñar de xeito “feminino” poñendo libros enriba da cabeza, como se ve na viñeta, sen importar ren o que tiña dentro esa cabeza.